Ordeli tschägged, leer mit Chriesi druff, Süüle-Schriibi wo voraagoot, chum zum Fälibaum us Traum und Niid, Wassermasse stürzed uf dis Liid,

Trümmligi Faable, Chleischter uf em Aug, Biene überem liise Huuch vo bruune Alge, Schönheit chasch nid

Xseh, nume mit Wüsse und Wille isch si mängmal fasch doo, am Entstoo, weder ganz do no ganz deet, Disziplin

Oder täglichs Tue isch nötig, hüüle chasch au spöter no, defür gits Spermatheke und Fermi-Paradox, mit ere nöchschte Büüle schaffsch vilech en neue Himmel, Stärne flüüge, Täg bruused eimaalig im Ohr wie Wall-Street-Wüete, aber ich han doch gsait dass, hii und her und her und hii, wo isch vore, Stutz für Stutz, Sturz für Sturz,

Bevor de Näggel sich ganz leert, Chreje sitzt ab, Chreje flüügt uf, en Schuelthek liit vergesse im Gras, en O-Ton wo foltered vor em einzige Tag wo wohr isch, wo öpper isch, öpper chunnt, en Art Mogli, en Art Waisechind, es Kaiserchind, de Heiri mit Bluet überem Aug, Tigerbrüele, jedem siis, jedem siis, do hesch es.